جنہیں میں ڈھونڈتا تھا آسمانوں میں زمینوں میں
وہ نکلے میرے ظلمت خانہ دل کے مکینوں میں،
حقیقت اپنی آنکھوں پر نمایاں جب ہوئی اپنی
مکاں نکلا ہمارا خانہ دل کے مکینوں میں،
کبھی اپنا بھی نظارہ کیا ہے تو نے اے مجنوں
کہ لیلیٰ کی طرح تو خود بھی ہے محمل نشینوں میں،
مہینے وصل کے گھڑیوں کی صورت اڑتے جاتے ہیں
مگر گھڑیاں جدائی کی گزرتی ہے مہینوں میں،
مجھے روکے گا تو اے ناخدا کیا غرق ہونے سے
کہ جنکو ڈوبنا ہو ڈوب جاتے ہیں سفینوں میں،
چھپایا حسن کو اپنے کلیم اللہ سے جس نے
وہی ناز آفریں ہے جلوہ پیرا نازنینوں میں،
جلا سکتی ہے شمعِ کشتہ کو موج نفس ان کی
الہیٰ کیا چھپا ہوتا ہے اہلِ دل کے سینوں میں،
تمنا دردِ دل کی ہو تو کر خدمت فقیروں کی
نہیں ملتا یہ گوہر بادشاہوں کے خزینوں میں،
نہ پوچھ ان خرقہ پوشوں کی ارادت ہوتو دیکھ ان کو
ید بیضا لیے بیٹھے ہیں اپنی آستینوں میں،
محبت کے لیے دل ڈھونڈ کوئی ٹوٹنے والا
یہ وہ مئے ہے جسے رکھتے ہیں نازک آبگینوں میں،
سراپا حسن بن جاتا ہے جس کے حسن کا عاشق
بھلا اے دل حسیں ایسا بھی ہے کوئی حسینوں میں،
نمایاں ہو کے دکھلا دے کبھی ان کو جمال اپنا
بھت مدت سے چرچے ہیں ترے باریک بینوں میں،
خموش!! اے دل۔۔ بھری محفل میں چلانا نہیں اچھا
ادب پہلا قرینہ ہے محبت کے قرینوں میں،
برا سمجھوں انہیں،مجھ سے تو یہ ہو نہیں سکتا
کہ میں خود بھی تو ہوں اقبال اپنے نکتہ چینوں میں۔
No comments:
Post a Comment